1Th 2 | NdeIBE | STEP | Liyakwazi bazalwane ukuthi ukuza kwethu kini akubanga liphutha.

1 Thessalonians 2

Inkonzo kaPhawuli kwabaseThesalonika

1 Liyakwazi bazalwane ukuthi ukuza kwethu kini akubanga liphutha.

2 Sasihluphekile ngaphambili njalo sithukiwe eFiliphi, njengoba lisazi, kodwa ngosizo lukaNkulunkulu wethu saba lesibindi sokulitshela ivangeli lakhe lanxa nje kwakulobunzima obukhulu.

3 Ngoba isicelo esisenzayo kasiveli ekuphosiseni loba enjongweni engcolileyo, njalo kasizami kulikhohlisa. 4 Kodwa sikhuluma njengabantu abavunywe nguNkulunkulu ukuba siphathiswe ivangeli. Kasizami kuthokozisa abantu kodwa uNkulunkulu, yena ohlola izinhliziyo zethu.

5 Liyakwazi ukuthi kasizange sisebenzise inkohliso, kumbe sifake isisitho ukuba sifihle ubuhwaba – uNkulunkulu ungufakazi wethu.

6 Kasifuni kubatshazwa okuvela ebantwini, loba kini kumbe omunye laye.

7 Njengabaphostoli bakaKhristu sasingaba ngumthwalo kini, kodwa saba mnene kini njengomama esondla abantwana bakhe abancinyane.

8 Salithanda kakhulu sathokoza ukuhlanganyela lani kungayisikho evangelini likaNkulunkulu kuphela kodwa lasekuphileni kwethu, ngoba lina laselithandeka kakhulu kithi. 9 Impela liyakhumbula, bazalwane, ukusebenza kwethu nzima lokuhlupheka; sasebenza ebusuku lemini ukuze singabi ngumthwalo lakubani lapho sitshumayela ivangeli likaNkulunkulu kini.

10 Lingofakazi, kanye loNkulunkulu, bokuthi sasingcwele, silungile njalo singasoleki phakathi kwenu lina elalikholwa. 11 Ngoba liyakwazi ukuthi ngamunye wenu saliphatha njengoyise ephatha abantwana bakhe,

12 siliqinisa, siliduduza kanye lokulikhuthaza ukuba liphile izimpilo ezifanele uNkulunkulu, olibizela embusweni wakhe lasenkazimulweni.

13 Njalo uNkulunkulu siyambonga kokuphela ngoba, ekwamukeleni kwenu ilizwi likaNkulunkulu, elalizwa ngathi, lalamukela hatshi njengelizwi labantu, kodwa njengoba linjalo impela, ilizwi likaNkulunkulu, elisebenzayo kini lina abakholwayo. 14 Ngoba lina, bazalwane, laba ngabalingisi bamabandla kaNkulunkulu eJudiya, akuKhristu uJesu; abantu belizwe lakini balihluphela izinto zinye amabandla lawo azihlutshelwa ngamaJuda,

15 abulala iNkosi uJesu labaphrofethi, thina asixotsha. Ayamcunula uNkulunkulu njalo ayizitha zabantu bonke 16 ekuzameni kwawo ukusalela ukukhuluma labezizweni ukuba basindiswe. Ngalokho bandisa izono zabo kakhulu. Ulaka lukaNkulunkulu seluze lwehlela phezu kwabo.

UPhawuli ulangatha ukubona amaThesalonika

17 Kodwa-ke, bazalwane, ekuhlutshulweni kwethu kini okwesikhatshana (uqobo lwethu, hatshi umcabango), kwathi ngokulangatha okukhulu senza imizamo yonke ukuba silibone.

18 Ngoba sasifuna ukuza kini – impela mina Phawuli, ngazama kanengi, kodwa uSathane wasivimbela. 19 Ngoba liyini ithemba lethu, intokozo yethu, loba umqhele esizazincoma ngawo phambi kweNkosi yethu uJesu Khristu ekufikeni kwakhe na? Akusini na?

20 Ngempela lina liludumo lwethu lentokozo yethu.